In Eanáir 2019, d’oscail an tAire Cultúir, Oidhreachta agus Gaeltachta an próiseas iarratais maidir le Liosta Sealadach na hÉireann i gcás maoine a d’fhéadfaí a ainmniú amach anseo le cur ar Liosta Oidhreachta Domhanda 2020-2030. 

Déanann Seirbhís Séadchomharthaí Náisiúnta (NMS) na Roinne maoirseacht ar an bpróiseas d’iarratais agus measúnú don Liosta Sealadach. Táimid ag lorg iarratais ó Údaráis Áitiúla, Comhlachtaí Stáit, eagraíochtaí pobail agus daoine príobháideacha maidir le láithreáin nó maoine a mheastar a bhfuil oidhreacht nádúrtha agus/nó cultúir ag baint leo de shárluach uilíoch (OUV), le cur ar Liosta Sealadach nua.

Caithfidh gach iarratasóir foirm iarratais a líonadh, ag tabhairt míniú ar an gcúis ar cheart  láithreán a áireamh ar an Liosta Sealadach, agus litreacha tacaíochta a chur ar fáil freisin ó na páirtithe leasmhara ábhartha. Ba chóir do na hiarratasóirí grianghraif agus íomhánna tacaíochta a chur ar aghaidh freisin ionas go mbeidh na measúnóirí in ann léargas a fháil ar an mhaoin atá molta.

Feidhmíonn an Roinn Cultúir, Oidhreachta agus Gaeltachta thar ceann na hÉireann mar Pháirtí Stáit chuig an gCoinbhinsiún maidir leis an Oidhreacht Dhomhanda. Tá sí freagrach as an gcáipéisíocht ainmniúcháin a chur isteach chuig UNESCO le maoin a áireamh ar an Liosta Oidhreachta Domhanda agus as tuairisciú do UNESCO ar staid chaomhnaithe ár maoine Oidhreachta Domhanda.

Ní féidir aon láithreán a ainmniú do stádas Oidhreachta Domhanda gan a bheith ar Liosta Sealadach na hÉireann ar dtús. Tá an Roinn freagrach as a shocrú na láithreáin a cheart a chur ar an Liosta Sealadach agus a chur ar aghaidh chuig UNESCO d’aon ainmniúchán Oidhreachta Domhanda ar deireadh.

Tá cuid mhór oibre agus ama i gceist le cáipeisíocht ainmniúcháin agus plean bainistíochta maoine a ullmhú, próiseas comhairliúcháin phoiblí san áireamh. Glacann an chéim sin den phróiseas, mar aon leis an gcomhairliúchán poiblí, dhá bhliain ar a laghad. 
Ina dhiaidh sin, glacann an próiseas inscríofa suas le bliain go leith ó chur isteach na cáipéisíochta comhlánaithe iomlán agus an plean bainistíochta go dtí measúnú an Choiste Oidhreachta Domhanda. Taobh istigh den tréimhse sin, déanfaidh na Comhlachtaí Comhairleacha don Choiste - ICOMOS (an Chomhairle Idirnáisiúnta um Shéadchomharthaí agus Shuíomhanna) agus IUCN (an tAontas Idirnáisiúnta do Chaomhnú an Dúlra) - measúnú ar an maoin atá molta féachaint an gcomhlíonann sí na riachtanais d’inscríobh ar an Liosta Oidhreachta Domhanda agus tuairisceoidh siad don Choiste.

Tá cóipeanna den fhoirm iarratais ar fáil thíos. Is féidir foirm a fháil freisin ach scríobh chuig Seirbhís na Séadchomharthaí Náisiúnta, an Roinn Cultúir, Oidhreachta agus Gaeltachta, Teach an Chustaim, Baile Átha Cliath D01 W6X0, ar an teileafón ag 01-8882178 nó trí ríomhphost a chur chuig worldheritage@chg.gov.ie

An 26 Meitheamh 2020 an spriocdháta deiridh chun tairiscintí a dhéanamh.

1.       Foirm Iarratais

2.       Foirm Toilithe Sonraí

3.       Litir Cheada Ó Úinéir Talún

4.       Treoirdhoiciméad

5.       Eolas a theastóidh don Foirm Iarratais

6.       Gluais

An Liosta Sealadach 2010